Yuxarı
loading...
loading...

Dövlət Komitəsindən açıqlama: Uşaq bağçasındakı olay...

12.06.2018 20:12 Oxunma sayı: 1431


Ailə, Qadın və Uşaq Problemləri üzrə Dövlət Komitəsi “Kids Studio” bağçasının əməkdaşları tərəfindən həmin bağçada tərbiyə olunan azyaşlı uşaqlara qarşı zorakılıq, kobud rəftar əks olunan videogörüntülərə dair açıqlama yayıb.

Dövlət Komitəsindən  daxil olan açıqlamada deyilir: “İyunun 11-də kütləvi informasiya vasitələrində “Kids Studio” bağçasının əməkdaşları tərəfindən həmin bağçada tərbiyə olunan azyaşlı uşaqlara qarşı zorakılıq, kobud rəftar əks olunan video görüntülər yayımlanıb.

Ailə, Qadın və Uşaq Problemləri üzrə Dövlət Komitəsi tərəfindən hadisənin araşdırılması ilə bağlı aidiyyəti dövlət orqanlarına müraciətlər ünvanlanıb. Verilən məlumata əsasən, hazırda məsələ ilə bağlı hüquq-mühafizə orqanları tərəfindən araşdırma aparılır və nəticələrdən asılı olaraq aidiyyəti orqanlar tərəfindən lazımi tədbirlər görüləcək.

Komitə uşaqların hüquqlarının müdafiəsini, onlarla düzgün rəftar edilməsini təşviq edir və bu siyasətin reallaşması istiqamətində tədbirlər həyata keçirir. BMT-nin “Uşaq Hüquqları haqqında” Konvensiyası əsas olmaqla, Azərbaycanın qoşulduğu bütün digər beynəlxalq sənədlərdə, Uşaq hüquqlarına dair Azərbaycan Respublikasının qanununvericiliyində uşaqların mənafelərinin üstün tutulması prinsipi təsbit edilib. Uşağa qarşı istənilən etinasızlıq, laqeyd münasibət, zorakılıq və qəddar davranış yolverilməzdir və bu cür hallar qanunvericiliyə əsasən məsuliyyətə səbəb olur.

“Məktəbəqədər təhsil haqqında” Azərbaycan Respublikasının Qanununa əsasən uşaqların şərəf və ləyaqətinə hörmət etmək, pedaqoji etika və əxlaq normalarına riayət etmək, təhsil işçisi adını yüksək tutmaq, ziyalılıq nümunəsi göstərmək, eyni zamanda, uşaqların təhlükəsizliyinin və sağlamlığının qorunmasında bilavasitə iştirak etmək, onları fiziki və psixi zorakılığın bütün formalarından qorumaq təhsil verənlərin əsas vəzifəsidir.

Bu baxımdan həmin şəxslərdən peşəkarlıq və xüsusi hazırlıq tələb olunur. Komitə baş vermiş hadisə ilə bağlı mütəxəssislərin peşəkarlıq səviyyəsinin artırılmasını və psixo-emosional vəziyyətlərinin araşdırılması istiqamətində işin gücləndirilməsini məqsədəuyğun hesab edir”.


loading...